ផ្លែប៉ោមបី
ព្រេងនិទានមួយរបស់រឿង ១០០១យប់ និយាយពីបុរសម្នាក់បានសម្លាប់ប្រពន្ធ កាត់ជាកង់ៗដាក់ហិប រួចយកទៅបណ្ដែតចោលតាមទឹកទន្លេ។ ក្រោយមក គេបានរកឃើញសាកសពនោះ ហើយដំណឹងឃាតកម្មនេះក៏លេចឮដល់ព្រះរាជា។ ស្ដេចផែនដីទ្រង់ជ្រាបសេចក្ដីហើយ មានព្រះតម្រិះថាត្រូវតែរកមុខឃាតករនោះឱ្យទាល់តែឃើញ ដើម្បីយកមកកាត់ទោស កុំឱ្យអ្នកផ្សេងទៀតយកគំរូអាក្រក់តាម។
សំណុំរឿងឃាតកម្មនេះ ស្រាប់តែមានមនុស្សប្រុស២នាក់ចូលមកសារភាពថា ខ្លួនជាឃាតករ សម្លាប់ស្រីម្នាក់នោះ។ បុរសវ័យចំណាស់បាននិយាយប្រាប់ព្រះរាជាថា ខ្លួនជាអ្នកសម្លាប់ ខ្លួនសុខចិត្តទទួលទោសឥតសុំតវ៉ាអ្វីឡើយ។ ឯចំណែកបុរសវ័យក្មេងម្នាក់ទៀតវិញ បែរជាមកយំយែកខ្លាំងៗរៀបរាប់អះអាងថា ការពិតគឺខ្លួនទេទើបជាអ្នកសម្លាប់ស្រីម្នាក់នោះពិតប្រាកដ។