ខ្មោចកូនខ្ញុំ
ប្ដីប្រពន្ធមួយគូរៀបការរួចជាច្រើនឆ្នាំ តែនៅមិនអាចមានកូនដូចបំណងប្រាថ្នាបាន ព្រោះកូនក្នុងពោះតែងតែរលូតខូចទៅវិញ។ ជាច្រើនលើកច្រើនសារ កូនដែលមកចាប់កំណើតជាមួយប្ដីប្រពន្ធមួយគូនេះសុទ្ធតែត្រូវស្លាប់ បើទោះជាពួកគេប្រយ័ត្នប្រយែង ថែរក្សាគភ៌គ្រប់ដង្ហើមចេញចូលយ៉ាងណាក៏ដោយ។
នៅមុនពេលរលូតកូនម្ដងៗ នាងជាភរិយាបានយល់សប្ដិឃើញរឿងដ៏ចម្លែកមួយ គឺមានក្មេងប្រុសម្នាក់មានទឹកមុខពេញដោយកំហឹង មកធាក់ពោះរបស់នាងខ្លាំងៗ។ នាងភ័យណាស់ស្ទុះក្រោកពីគេងទាំងមមិងមមាំង និងឈឺចាប់ក្នុងពោះ ហើយថែមទាំងមានហូរឈាមប្រឡាក់ជើងយ៉ាងច្រើនទៀតផង។
