កូនក្រមុំផ្កាស្លា
ម៉ាកគឺជាកូនប្រុសទោលក្នុងគ្រួសារម្ចាស់ក្រុមហ៊ុនទេសចរណ៍នៅភ្នំពេញ។ អ្នកប្រុសកំលោះមានចរិតរាងឆ្មើងឆ្មៃបន្តិចតាមទម្លាប់កូនអ្នកមាន ប៉ុន្តែគេក៏ព្រមមកចុះចាញ់ត្រឹមដុកទ័រក្រមុំខេត្តព្រះសីហនុ។ មុន្នីមានម្ដាយជាម្ចាស់សណ្ឋាគារតូចមួយនៅទីនោះ តែស្រីពេញចិត្តនឹងការងារជាគ្រូពេទ្យទៅវិញ។ ម៉ាកនិងមុន្នីមិនត្រូវគ្នាតាំងពីជួបគ្នាលើកដំបូង ប្រៀបដូចធ្មេញនិងអណ្ដាត ព្រោះម៉ាកមានសម្ដីមិនសមរម្យមកលើមុន្នី ដោយតាមតែចរិតរបស់គេ ។ ក្រោយៗមកម៉ាកបានជួបនាងនៅមន្ទីរពេទ្យទៀត ព្រោះគេពុលអាហារ និងពេលដែលអ្នកមានគ្រោះថ្នាក់ចរាចរណ៍ ទោះជាស្អប់មុខម៉ាក ក៏មុន្នីមិនយករឿងផ្ទាល់ខ្លួនមកឡូកឡំនឹងការងារដែរ នាងមើលថែរទាំអ្នកជំងឺយ៉ាងល្អតាមតួនាទី។ មានមួយលើកនោះ កំលោះយើងលង់ទឹក ព្រោះគេរមួលក្រពើ ចៃដន្យល្អណាស់ដែលមុន្នីបានឃើញទាន់ ហើយប្រញាប់ចុះទៅជួយ ពេលម៉ាកបានដឹងខ្លួន គេរកចង់អរគុណដែរតែស្រីត្រឡប់ទៅវិញយ៉ាងរហ័ស ទាំងពីរនាក់បែរមានអារម្មណ៍ចម្លែកខុសធម្មតាទៅវិញ។ អារម្មណ៍ស្រឡាញ់មនុស្សម្នាក់បានកើតឡើង ម៉ាកហាក់បានដឹងខ្លួនថាគេចាប់ចិត្តទៅលើដុកទ័រក្រមុំហើយ អ្នកក៏តាំងជួប ចង់បាននៅជិត តែមិនហ៊ានសារភាពប្រាប់ ព្រោះធម្មតាពួកគេមិនជាត្រូវគ្នាទេ។ ក្រោយរឿងរ៉ាវគ្រួសារមុន្នីបានបញ្ចប់ ព្រោះប៉ារបស់នាងបានមកជួបជុំគ្រួសារវិញ ទាំងដែលនាងមិនដែលឃើញមុខតាំងពីកើត តែនៅថ្ងៃមួយម៉ាកឃើញបុរសម្នាក់នៅជាមួយនាងយ៉ាងស្និទ្ធស្នាល គេបែរយល់ថាជាសង្សារនាង វាបានធ្វើឱ្យបុរសសម្បូរស្នេហ៍ម្នាក់នេះ មានការខូចចិត្ត ទើបព្រមត្រឡប់មកភ្នំពេញវិញទាំងខកស្នេហ៍។ កន្លងផុតទៅប៉ុន្មានខែ នរៈសង្ហាបានមកលំហែកាយម្ដងទៀត តែខ្លួនគេបានផ្លាស់ប្ដូរយ៉ាងច្រើន។ គេបានយល់រឿងដែលបានកើតឡើង ការពិតមុន្នីគ្មានសង្សារទេ ទើបម្ដងនេះម៉ាកសម្រេចសារភាពប្រាប់ស្រី មុន្នីវិញក៏យល់ព្រម។ ចុងក្រោយផ្កាស្លាមកដល់មុខផ្ទះ នាងបានធ្វើឱ្យម្ដាយនាងរីករាយញញឹមបិទមាត់មិនជិត ព្រោះដោយសារការរំលងប្រពៃណីនេះហើយ ទើបធ្វើឱ្យមុន្នីរស់នៅគ្មានប៉ាជាង២០ឆ្នាំ។