មិនមែនជាមនុស្សក្នុងសុបិន តែជាមនុស្សក្នុងពិភពពិត
មានអ្នកណាបានអានរឿង “ស្នេហ៍ក្នុងភពសុបិន” ហើយឬនៅ? សម្រាប់អ្នកអានហើយ តើមានចាំទេថាក្មេងស្រីម្នាក់ដែលមានស្នេហាជួបមនុស្សដែលខ្លួនពេញចិត្ត តែបែរជាព្យាយាមរត់គេច មិនហ៊ានទទួលសូម្បីក្នុងសុបិននោះ។ ចាំទេថា នាងធ្លាប់បានសន្យាថាម៉េចខ្លះបន្ទាប់ពីក្រោកពីសុបិន? “ok ខ្ញុំសន្យា ខ្ញុំនឹងមិនរត់ទៀតទេ បើពិតជាមានមនុស្សដូចជាអ្នក ជួបខ្ញុំក្នុងពិភពពិតនេះមែន” តោះ ពេលនេះមកមើលពីជីវិតពិត ក្រៅភពសុបិនរបស់នាងម្ដងទៅមើល តើនាងអាចធ្វើតាមសន្យាខ្លួនបានដែរទេ… ………………………… មនុស្សស្រីម្នាក់ដែលមានទាំងរូបសម្បត្តិ ទ្រព្យធន ប្រាជ្ញា ការងារ ចំណេះដឹងខ្ពង់ខ្ពស់ ត្រូវបានមនុស្សជុំវិញខ្លួនកោតសរសើរស្ញប់ស្ញែង នូវភាពជោគជ័យទាំងឡាយដែលនាងមាន គួរជាទីមោទនភាពបំផុតដែលគ្រប់គ្នាច្រណែនចង់បាននូវអ្វីដូចដែលនាងមាន។ នាងមានចរិតជាខ្លួនឯង មិនចូលចិត្តនិយាយច្រើន តែចូលចិត្តពន្យល់ជាក់ស្ដែងតាមសកម្មភាព ធ្វើអ្វីមិនចូលចិត្តរណប ពឹងផ្អែកលើអ្នកណាឡើយ ចង់ទៅណាគឺទៅមិនថាមានអ្នកទៅជាមួយ ឬគ្មានក្ដី ព្រោះបើទៅជាមួយមនុស្សដែលមិនត្រូវចិត្តផង នាងទៅម្នាក់ឯងល្អជាង។