និស្ស័យស្នេហ៍ខ្ញុំ
គិតៗទៅលើលោកនេះ គ្មានអ្វីដែលឋិតថេរនោះទេ! ខ្ញុំឈ្មោះអ៊ែនណាជាកូនស្រីអ្នកជនបទ។ ខ្ញុំមានប្អូនប្រុសម្នាក់ កាលមុនសង្គ្រាមជីតាគឺជាអ្នកមានមុខមាត់កិត្តិយសនិងទ្រព្យសម្បត្តិដែរ តែក្រោយពីត្រលប់មកពីសង្គ្រាមវិញ គ្រួសារខ្ញុំក៏ធ្លាក់ខ្លួន ហើយលោកតាក៏បានស្លាប់ ដូច្នេះគ្រួសារខ្ញុំត្រូវចាប់ផ្ដើមរកស៊ីពីបាទដៃទទេមកវិញ។
នៅពេលខ្ញុំមានអាយុ៦ឆ្នាំ ប៉ាខ្ញុំបានស្គាល់គ្នានិងរាប់អានជាមួយអ៊ំប្រុសម្នាក់ ដែលគាត់ជាម្នាក់ជំនួញសណ្ឋាគារនិងអចលនទ្រព្យ ទោះគាត់មានជាងគ្រួសារខ្ញុំ តែគាត់មិនរើសអើង ឬប្រកាន់អ្វីឡើយគាត់ជាមនុស្សល្អណាស់ គាត់គឺលោកអ៊ំសម្បត្តិ។ ហើយបន្ទាប់ពីនោះប៉ាក៏បានចាប់ផ្ដើមរកស៊ីជាមួយលោកអ៊ំ ។
ក្រោយមកខ្ញុំក៏បានជួបនឹងក្មេងប្រុសម្នាក់គេឈ្មោះដេវីន គេមានអាយុបងខ្ញុំ៧ឆ្នាំ គេជាកូនប្រុសទោលរបស់លោកអ៊ំសម្បត្តិ ដែលលោកអ៊ំបាននាំឱ្យស្គាល់និងមកលេងជាមួយខ្ញុំ ក្រោយមកពួកយើងក៏ស្និទ្ធស្នាលនឹងគ្នារហូតដូចជាបងប្អូនចឹង។ តែអ្វីមិនទៀងនោះទេ ពេលខ្ញុំអាយុ៩ឆ្នាំ ប៉ាម៉ាក់បងដេវីនបានបញ្ជូនគាត់ឱ្យទៅរៀននៅអាមេរិក គាត់ទៅដោយមិនបានលាខ្ញុំមួយម៉ាត់ឡើយ ។
