មនុស្សស្មោះចេះក្បត់
ជូឡាយគឺជាកូនមន្ត្រីរាជការថៃមួយរូប ដែលសិក្សានៅមហាវិទ្យាល័យជូឡាឡុងកន ហើយទីនោះគឺជាកន្លែងដែលនាងបានជួបនិតវិសុន ជានិស្សិតខ្មែរដែលបានជាប់អាហារូបករណ៍ទៅសិក្សានៅទីនោះ។ ពួកគេបានទាក់ទងគ្នាជាគូស្នេហ៍រយៈពេលពីរឆ្នាំ។ ជូឡាយជាអ្នកសុំវិសុនបែកគ្នា ព្រោះនាងប្រចណ្ឌគេផង ចង់បង្កើតជម្រើសឱ្យខ្លួនឯងផង។ ក្រោយបញ្ចប់ការសិក្សាជូឡាយបានត្រឡប់មកធ្វើការនៅភ្នំពេញ ហើយក៏បានជួបនិតវិសុនម្ដងទៀត ក្រោយបែកគ្នារយៈពេលបួនឆ្នាំ។ ពេលបានជួបនិតវិសុនម្ដងទៀត ទើបនាងស្គាល់ច្បាស់ពីចិត្តខ្លួនឯងថា ការពិតនាងនៅស្រឡាញ់គេនៅឡើយទេ គ្រាន់តែកាលនោះនាងនៅក្មេងពេក មិនទាន់ចេះគិត។ អ្វីដែលនិតវិសុនធ្វើចំពោះនាង នាងមានអារម្មណ៍ថាគេក៏នៅតែស្រឡាញ់នាងដែរ ប៉ុន្តែម្នាក់ៗហាក់មិនក្លាហានក្នុងការបង្កើតស្នេហានេះឡើងម្ដងទៀត។ មានថ្ងៃមួយ វិសុនបានបាត់មុខពីជូឡាយដល់ទៅមួយខែ ហើយជូឡាយក៏ត្រូវបន្តការសិក្សានៅហូឡង់ទៀត... តែអ្វីដែលគួរឱ្យរន្ធត់ចិត្តគឺ និត វិសុនបានអញ្ជើញនាងទៅចូលរួមមង្គលការរបស់គេ។ ជូឡាយពិតជាឈឺចាប់ខ្លាំងណាស់ ហើយទើបដឹងការពិតថាវិសុនគ្រាន់តែចង់បង្រៀននាងឱ្យស្គាល់រសជាតិឈឺចាប់ដូចគេប៉ុណ្ណោះ។ ដូច្នេះជូឡាយក៏សម្រេចចិត្តទៅហូឡង់ និងមិនត្រឡប់មកភ្នំពេញវិញដាច់ខាត។
